Kaitohutohu Matua ā-Iwi - Senior Advisor Iwi Relationships
Museum of New Zealand Te Papa Tongarewa
Kaitohutohu Matua ā-Iwi - Senior Advisor Iwi Relationships
Tuia te tangata, tuia ngā kōrero, tuia ngā taonga
E kimi nei a Te Papa i tētahi Kaitohutohu Matua ā-Iwi - Senior Advisor Iwi Relationships. Ka whai wāhi mai te tūranga nei ki te waihangatanga o tētahi Rautaki Tūhononga me te Whakapānga ki te Māori mō Te Papa, me te āta whai whakaaro ki ngā haepapa o Te Papa ki Te Tiriti o Waitangi, mātua rā te aronga ki ngā whakataunga kerēme Tiriti o Waitangi me te tūhononga nō muri mai i ngā whakataunga.
Ko te whānau whānui tonu o te tūranga nei ko te tari o Ngā Manu Atarau. Heoi anō tā rātou, he kōkiri i te whanaketanga o te ao Māori, o ngā tikanga, o tō tātou reo, me te āheinga o Te Papa ki te whakatutuki i ana haepapa ki Te Tiriti o Waitangi me ngā here ki te ture. E ū ana te tari nei ki te whakakitenga o Te Papa, kia tū te whare nei hei whare taonga tumu Tiriti, kei reira te whakapūmautanga o te katoa ki te Tiriti o Waitangi, ā, ka whakamahia e te Māori te tino rangatiratanga. Ka whai wāhi mai koe ki te tīma Iwi Relationships. Ko tā te tīma e whai nei, ko te whakapakari me te whakamāori i te āhua o tā Te Papa mahi tahi ki te iwi Māori, o tā Te Papa kawe i a ia anō, me te whakaū i te mātāpono Mana Taonga mō te wāhi ki te manaaki i a tātou taonga.
Ko tā te Kaitohutohu Matua ā-Iwi mahi, he waihanga, he whakarite, me te whakaū i tētahi rautaki whakawhanaunga ki te iwi Māori puta noa i Te Papa. Ka riro māu te kōkiri i ngā i mahi ki ngā matapaki ā-Tiriti o Waitangi, te wāhi ki ngā whakataunga kerēme, ngā mahi ā muri mai hoki, ā, kia auaha, kia rerekē ngā hua i te whakaritenga o ngā kirimana, ngā anga mahi, ngā tohutohu, ngā mahere mahi me ngā hōtaka mahi i waenga i a Te Papa me te iwi Māori whānui tonu.
Ka riro hoki māu te haepapa mō ngā rīpoata ki ngā iwi, ki te hunga whai pānga ki a Te Papa, otirā ki a Te Papa tonu, ki te āta tātari i te pakari me te pai o ngā hononga i waenga i te iwi Māori me Te Papa. Ka mutu, tā te tūranga nei, he hopu katoa i ngā mahinga tahitanga a Te Papa ki te ao Māori, me te whakauru katoa ki tētahi puna pupuri kōrero. Māu tonu e whakaawe i ā Te Papa pūnaha, ngā pepa, ngā tukanga hoki mō te wāhi ki te whakawhanaunga me te whai hononga atu ki te ao Māori, ki tō te Māori titiro.
Tā mātou e kimi nei:
- He tangata mōhio ki te mahi tahi ki te iwi Māori whānui tonu (ngā hapori, ngā iwi, ngāhapū, ngā whānau, ngā marae, ngā tari Māori)
- He tangata kei a ia kē āna ake hononga ki te ao Māori
- He matatau ake nei ki Te Tiriti o Waitangi, ki te reo, me ngā tikanga Māori
- He mōhio ki te tuhi i ngā whakaritenga mahi tahi me aua momo pepa tūhonohono, tae atu ki ngā anga mahi, ngā tohutohu taunaki
- He reka hoki ki te rangatiratanga o te raraunga Māori, te whakahaumaru i te Mana Whakairo Hinengaro, ka mahi tahi ana a Te Papa me te iwi Māori.
He tūranga ukiuki pūmau tēnei, e piri mai ana ki te tīma Iwi Relationships, ka mutu, ka taea te āta kōrero mō ngā hāora mahi, me te mahi mai i te kāinga.
Te rohenga utu: $91,773 - $108,980
Te rā kati: Mane te 9 o te Tīhema o 2024
Katoa ngā kaitono me āhei ki te mahi ki Aotearoa ki tā te ture, ka mutu, me pērā tonu ā mohoa noa nei.
Follow this link for an english translation: https://jobs.govt.nz/jobs/NZ-2303
Apply Now
