Kaitohutohu Rautaki ā-Iwi - Strategic Advisor Iwi Relationships
Museum of New Zealand Te Papa Tongarewa
Tuia te tangata, tuia ngā kōrero, tuia ngā taonga
E tino hīkaka ana a Te Papa ki te whakakapi i tēnei tūranga, ā, koia ko te Kaitohutohu Rautaki ā-Iwi. Heoi anō tā te tūranga nei, he tautoko i tō tātou whare mā te whakapakari i ngā hononga i waenga i te ao Māori whānui tonu me Te Papa, me te tūhono hoki i ngā uri ki ā rātou taonga.
Ko te whānau whānui tonu o te tūranga nei ko te tari o Ngā Manu Atarau. Heoi anō tā rātou, he kōkiri i te whanaketanga o te ao Māori, o ngā tikanga, o tō tātou reo, me te āheinga o Te Papa ki te whakatutuki i ana haepapa ki Te Tiriti o Waitangi me ngā here ki te ture. E ū ana te tari nei ki te whakakitenga o Te Papa, kia tū te whare nei hei whare taonga tumu Tiriti, kei reira te whakapūmautanga o te katoa ki te Tiriti o Waitangi, ā, ka whakamahia e te Māori te tino rangatiratanga. Ka whai wāhi mai koe ki te tīma Iwi Relationships. Ko tā te tīma e whai nei, ko te whakapakari me te whakamāori i te āhua o tā Te Papa mahi tahi ki te iwi Māori, o tā Te Papa kawe i a ia anō, me te whakaū i te mātāpono Mana Taonga mō te wāhi ki te manaaki i a tātou taonga.
Ko tā te Kaitohutohu Rautaki ā-Iwi - Strategic Advisor Iwi Relationships, he tū hei kaitakawaenga mā Te Papa me te iwi Māori whānui tonu, he waha ake i ngā take whai pānga ki te iwi Māori, he manaaki i ā tātou manuhiri, me te noho tuwhera ki ngā kaupapa whai hua ki te iwi Māori. Tokotoru katoa koutou i te tūranga nei, ā, ko te tino aronga o tāu tūranga ko te taiao. Koia nei ko te kaitakawaenga o te mātauranga Māori me te pūtaiao, e kimi nei i ngā ara kia angitu ai te iwi Māori e hāngai ana ki tō tātou taiao, ka mutu, he kōkiri i ngā kaupapa o te Maramataka me Matariki.
Tā mātou e kimi nei:
- Tangata mōhio ki te reo me ngā tikanga
- Tangata mōhio ki te whakawhanaunga atu ki te iwi Māori
- Tangata kei a ia kē āna ake hononga ki te iwi Māori i te ao taiao
- Tangata mōhio ki te whakahaere me te whakatutuki i ngā kaupapa pīroiroi
- Tangata mōhio ki te whakahoahoa ki tangata kē atu, otirā he pūkenga i ngā mahi matapaki me temahi mātanga
- Tangata matatau ki Te Tiriti o Waitangi me tana pānga ki te iwi Māori
He nui ngā āheinga ka taea. Nōu ka tūhura i ngā kohinga taonga Māori, me ngā kohinga taonga pūtaiao māori e hāngai ana ki te maramataka, ka kite koe i te pito mata. Mā reira tuwhera ai ngā tatau ki te whakarauora i ngā tikanga me uaua ka kite i ēnei rā, me te whakaū i te hononga o te mātauranga Māori ki te orangatonutanga o te taiao. Kāore e kore ka mahi tahi koe ki ngā tohunga, ki ngā mātanga, me ngā hapori Māori ki te whakatutuki i tēnei whāinga. Tomo mai rā kia whakaawe whakaaro, kia tūhono tangata, kia waihanga kaupapa, kia whakapakari hoki tātou i ō tātou hononga ki te ao Māori.
He tūranga ukiuki pūmau tēnei, e piri mai ana ki te tīma Iwi Relationships, ka mutu, ka taea te āta kōrero mō ngā hāora mahi, me te mahi mai i te kāinga.
Te rohenga utu: $79,299 - $94,167
Te rā kati: Mane te 9 o te Tīhema o 2024
Katoa ngā kaitono me āhei ki te mahi ki Aotearoa i raro i te ture, ka mutu me pērā tonu ā mohoa noa nei.
Follow this link for an english translation: https://jobs.govt.nz/jobs/NZ-23205
Apply Now
